Sunday, September 13, 2009

Pak Ayie Ayie Meninggal

Karuo- karuo bini ea nangisie Pak Ayie Ayie sambil ia duduk bacangkong di sisi kuburan ea. Mangkea gak mayat ea dah dangan nurunan ke daamk ubangk kuburan. Masing masing dangan dah nangkap cangkut, sakop. Ada ang dah narik tali yak nurunan keranda koa taie. Dangan dah maok nimbus sak kuburan Pak Ayie Ayie koa kandak ea. Tapi bini ea masih karuo-karuo di sisi kuburan koa. Kasih ugak dangan nanang ia.

Bini Pak Ayie Ayie masih karuo-karuo nanggis. Sape ba gak unang ang annak sayang ka aki. Tapi jamaea yak lah mun dah janyie takat koa. Sape sape pun ka koa ugak ampus ea. Ngaramus ka Saruga atau takat di Titi Bajoa perjalanan apas koa, terpulang lah ka keridupant masing masing waktu masih idup. Mun banar banar sambahyang, ka Saruga lah mangkalie ngaramus ea. Mun sambayang olok olok atau mun annak picayak lalu ngan sambayang koa, mungkin ulang alik di Titi Bajoa koa ajak lah mangkalie.

"Woo woo..hie. hie.." ugak agik. Bini Pak Ayie Ayie terus menerus nanggis di sisi ubangk kuburan aki ea. "Tabanan ugak ea aku ...biar lah dirik mati sabaya baya..hie..hie..eee"

Payah dangan nimbus ak kuburan Pak Ayie Ayie. Bini ea koa nang baiek lalu dari. Biar ia sampea tiharap atas tanah di sisi kuburan koa. Nang ribea lalu nya ar.

"Woo..wooo..hiee...hiee..tabanan aku gak ea...jamaea lah aku idup ak...hie..hiee..ee..biar lah dirik dikubur sabaya baya..hie..hie.. eee..."

Antah jamaea, adalah kamudak ang dah amparek mabuk mabuk lalu nyamakie bini Pak Ayie Ayie koa. Lalu..chapak sinyorongan bini Pak Ayie Ayie koa ke daamk ubangk kuburan Pak Ayie Ayie ang lebih kurang anam kaki daamk ea. Bakatabik ihan ea bini Pak Ayie Ayie koa ngenyek mayat aki ea.

Dah.. lalu batukar tune karuo ea. Kahiar-kahiar unang nya ar ka dangan ang di atas; minta tarik kauar. Mangkea nang taie mintak kubur bersama-sama. Maok mati bersama..Bila dangan nyorongan ke daam kuburan aki ea, tang dah minta tarik kauar nya unang! Tangka paringkak manusia.

"Tarik aku..!!Tarik aku..!! Gaik aku...! Tolonggggg....!



Pak Ayie Ayie lalu takajut nangar kariak bini ea. Ia nanang bini ea tidur di sebelah ea kahangap kahangap aya kana teleh antu. Ia ngichangk banta goleng ea lalu chapak si mangkong bini ea..

"Hoi..duhanie..ngarimpapu kau nyian.." ja Pak Ayie Ayie ka bini ea.

Pas koa lalu singkak-singkak bini ea koa nanggis. Nang gak nanggis sidi sidi nya ar..

"Aku bamimpi kau dah meninggal.." ja rea ka aki ea.

Pak Ayie Ayie senyum ajak..

2 comments: